Goierriko Hitza

2008-06-30 | 13:00:06

Jexuxmari Ormaetxea Urkik jantzi du Gipuzkoako Txapela Zaldibian

Orendaingoak ia ehun kiloko aldea atera zion bigarren egin zuen Goikoetxeari

Pronostikoak bete egin ziren azkenean, eta Jexuxmari Ormaetxea Urkik irabazi zuen Gipuzkoako Sega Txapelketa. Atzo jokatu zen finala Zaldibiako larreetan, eta ia ehun kiloko aldearekin nagusitu zen Urki. Hiru sailkapen proba egin ondoren, lau segalarik lortu zuten finalerako txartela. Ormaetxeaz gain, Andoni Goikoetxea, Mikel Aranalde eta Arkaitz Arteaga ere aritu ziren. Saio ederra egin zuen Urkik, eta erraz nagusitu zitzaien gainontzeko hirurei. Ordubeteko lanean, 2.689 kilo belar ebaki zituen Orendaingoak. Bere atzetik, 94,5 kilo gutxiago ebakita, bigarren postuan geratu zen Andoni Goikoetxea gazteluarra. Hasieratik aurrea hartu zuen Urkik, eta hirugarren saila bukatutakoan Goikoetxea aurretik jarri bazen ere, Orendaingoak buelta eman zion saioari.

Ez du erantzunik

2008-06-27 | 12:39:54

Zaldibian jokatuko da azkenean Gipuzkoako Sega Txapelketaren finala

Larraitzen egitekoa bazen ere, belarraren egoera txarra dela medio, lekuz aldatzea erabaki dute

Zaldibiako larreetan jokatuko dute igandean Gipuzkoako Sega Txapelketaren finala. Azken orduko aldaketa bat dela medio, proba ez da Larraitzen egingo, eta Ibarguren baserriko Etxaburuko belardian bilduko dira Gipuzkoako segalaririk onenak. Lau gizonezko arituko dira nor baino nor: Jexuxmari Ormaetxea Urki, Andoni Goikoetxea, Mikel Aranalde eta Arkaitz Arteagak osatzen dute laukotea. Iazko txapelduna, Joxe Gabirondo gazteluarra, ez da aurtengo finalean izango. Igande eguerdiko hamabietan hasita, ordubete inguruko saioa egingo dute eta belar kilo gehien ebakitzen duenak jantziko du Gipuzkoako txapela.

Ez du erantzunik

2008-04-24 | 16:05:25

Uraren Interpretazio Zentroak banatuko ditu Arkakan arrantza egiteko baimenak

Orain arte Gaztelu Ehiza eta Arrantza Elakrtea arduratzen zen lan horretaz

Arkakako arrantza eskola, Uraren Interpretazio Zentrotik kudeatuko dute hemendik aurrera eta beraz, arrantza eskolan arrantzan egin ahal izateko baimenak bertan banatuko dituzte. Iazko denboraldian zehar Zaldibiako Gaztelu Ehiza eta Arrantza elkartea izan zen Arkaka arrantza eskolako barrutia kudeatu zuena, Gipuzkoako Arrantza Federakuntzarekin batera. Baimenak bestalde Arrese jatetxean banatzen zituzten. Arkaka Uraren Interpretazio Zentroak eguneko 10 baimen banatuko ditu eta asteko egun guztietarako balioko dute, asteartetarako izan ezik, asteartetan ezinezkoa baita barruti horretan arrantzan aritzea. Federatuek zein federatugabeek egin dezakete arrantza eremu horretan, baina batzuk eta besteek ordaindu beharrekoa desberdina da. Federatu helduek 4 euro pagatu behar dituzte eta federatu haurrek euro bakar bat. Federatugabe helduek zein haurrek berriz, 20na euro jarri beharko dituzte.

Ez du erantzunik

2008-03-25 | 13:48:01

Karratuk 23:27ko denboran lotu ditu Saturdi eta Larraizko ermitak

Zaldibiarrak marka jarri du honela; datorren urtean hobetzen saiatuko da

Saturdi eta Larraizko ermiten arteko joan-etorria egiteko, 23 minutu eta 27 segundo behar izan zituen atzo Javi Cuadrado 'Karratu' atletak. Datozen urteetarako marka jarri du honela. Eguraldiak ez zuen asko lagundu eta errepidea irristakor zegoen. Hala ere, gustora bukatu zuen proba zaldibiarrak, helburua 24 minututik behera egitea baitzen. Hala ere, datorren urtean ahalegin berri bat egingo duela iragarri zuen Karratuk.

• Aizkolari beteranoek ikuskizun ederra eskaini dute

Ez du erantzunik

2008-03-18 | 17:23:36

Aizkolari beteranoen saioa eta Karraturen marka ahalegina izango dira Saturdiko festan

Hilaren 24an ospatuko dute jai eguna Saturdiko ermitaren inguruan

Datorren astelehenean, hilak 24, urteroko festa ospatuko dute Zaldibiako Saturdi auzoan. Egun osoko egitaraua antolatu dute, baina aurtengo berrikuntza nagusiak arratsaldeko 18:00etatik aurrera izango dira. Javier Cuadrado 'Karratu' atletlak marka ahalegina egingo du, Saturditik eta Larraizko ermitara joan etorria korrika eginez. Bitartean, aizkolari beteranoen saioa ere izango da. Arria II eta Joxe Aierbe, Leonzio Goñi eta Altzoren kontra ariko dira, bikoteka.

• Saturdiko festaren egitaraua

Ez du erantzunik

2008-03-07 | 19:27:25

Juan Mari Olano aske geldituko da 30.000 euroko fidantza ordainduta

Ongietorri ekitaldietan parte hartzeko deia egin du Askatasunak

Juan Mari Olano Amnistiaren Mugimenduko kidea aske geldituko da, 30.000 euroko fidantza ordaindu ondoren. Askatasunak, «Olanoren kontra hartu dituzten errepresio neurri guztiak» salatu nahi izan ditu, orain arte «erabat bakarturik, isolamenduan» izan baitute. 2007ko irailean atxilotu zuten Olano azkeneko aldiz, Donostian aurrez debekatuta zegoen manifestazio batean parte hartzeagatik. Auzitegi Nazionaleko Baltasar Garzon epaileak Olano atxilotzeko agindua eman zuen. Lehendik auzia irekita duen 33/01 sumarioan baldintzapeko askatasunean zegoen, eta delitu haiek errepikatzea leporatu zioten. Ertzaintzak atxilotu ondoren, Soto del Real espetxean sartu zuten. Handik, Segoviara eraman zuten Olano, eta Askatasunak orduan ere salatu zuenez, isolatuta eduki zuten.

Erantzun 1

2008-02-19 | 14:18:35

Aralarrek bosgarren zinegotzia hartu ondoren, "hautsitzat" eman dute Zaldibiako udal akordioa

EAE-ANVk "iruzurra" egitea eta "adostasunean oinarritutako udala puskatzea" leporatu dio Aralarri

2007ko maiatzeko udal hauteskundeetan berdinketa lortu ondoren, Aralarrek eta EAE-ANVk "adostasunean oinarritutako udal akordioa" egin zuten. Honen arabera, alderdi bakoitzak launa ordezkari izango zituen, eta erabakiak aho batez hartuko ziren. Zazpi hilabete ondoren ordea, egoerak okerrera egin du, eta joan den ostiraleko udalbatzan, Aralarrek bosgarren zinegotzia hartu zuen. Patxi Aierbek azaldu duenez, hemendik aurrera ere "adostasunaren bila" jarraituko dute, eta bosgarren zinegotzia "bi aldeak ados daudenean bakarrik" erabiliko dute. EAE-ANVk ordea, "iruzurra" egitea leporatu die. "Herriak emandako hitza ez dute errespetatu, eta ustez kontra dauden alderdien legea aprobetxatu dute bosgarren zinegotzia hartzeko".

24 erantzun

2007-11-21 | 11:32:57

Telefono haria lapurtzen saiatu dira Zaldibian bart

Kablea eraman ez duten arren zerbitzua etenarazi egin dute

Bart ere telefono lineako haria lapurtzen saiatu dira Zaldibian, irailetik hona gertatzen den bosgarren gertaera bihurtuz. Oraingoan lapurrek ez dute kablea tokitik eramatea lortu, baina eten egin dute, linea moztuz. Telefonicak zerbitzua gaur egunean zehar berrezarriko duela esan du.

Ez du erantzunik