Goierriko Hitza

Musika eta kultura ezberdinek bat egingo dute bihar Zaldibiako Sustraiez Blai jaialdian. Gaueko 22:30ean hasita, nazioarteko eta Euskal Herriko lau taldek joko dute Zaldibiako antzokian. Euskal Herritik, Ja ta Ja talde nafarra eta Makala DJ zarauztarra izango dira. Marseilatik datorren Raï Na Rap taldeak berriz, Aljeriako Raï musika eta Reggae estiloa uztartuko ditu. Kartel buru moduan datorrena berriz, Dr.Ring-Ding alemaniarra da, Europa mailan, musika jamaikarrari ekarpenik handiena egin dion artista bezala definitu dute adituek. Kontzerturako sarrerak, 12 eurotan daude salgai Ordiziako Goierriko Baratza dendan eta Beasaingo Irizar kafetegian daude salgai. Bestalde, antolatzaileek jakinarazi dutenez, kontzertuan zehar Balear irletarako bidaia bat zozkatuko dute ikusleen artean.

Goieki garapen agentziak, Sustraiez Blai jaialdira joateko autobus zerbitzu berezia jarri du biharko. Bi linea izango dituzte. Aurrenekoa, Lazkaoko Lazkao Txiki zelaitik (eliza paretik) abiatuko da, 21:30ean. Handik abiatuta, Ordiziako tren geltokian (21:45) eta Otegienean (21:50) egingo ditu geldialdiak, Zaldibiara iritsi aurretik.
Bigarren autobus linea, berriz, Beasaingo Antzizar kiroldegitik (21:45) aterako da, tren geltokian (22:00) eta Porteria auzoan (22:05) geldituz. Ordiziako geltokira 22:15ean iritsiko da bigarren linea horretako autobusa, eta Otegienetik (22:30) Zaldibiara abiatuko da.
Itzultzeko ere bi autobus jarri dituzte. Lehen lineakoa (Zaldibia-Lazkao) goizeko 03:00etan aterako da Zaldibiako plazatik. Bigarrena (Zaldibia-Beasain), 04:00etan.