Goierriko Hitza

Zaldibian jokatuko dute azkenean Gipuzkoako sega txapelketako finala

Zaldibia Larraitzen egitekoak baziren ere, hango larreen egoera behar bezalakoa ez delako Zaldibian izango da finala.

arkaitz apalategi

Zaldibiako larreetan jokatuko da azkenean Gipuzkoako Sega Txapelketaren finala. Berez Larraitzen egitekoa zen proba, baina hango belarraren egoera egokia ez zela eta, Zaldibiako Ibarguren baserriko Etxaburuko belardian egingo dute. Lau segalari ariko dira nor baino nor, igande eguerdian hasita.

Sailkapen fasean hiru jardunaldi jokatu dituzte denera. Aurrenekoan Andoni Goikoetxea gazteluarra nagusitu zen. Azken bietan, berriz, Jexuxmari Ormaetxea. Horrenbestez, lau segalarik lortu dute finalerako txartela. Jexuxmari Ormaetxea Urki-k, Andoni Goikoetxeak, Mikel Aranaldek eta Arkaitz Arteagak osatzen dute laukotea. Iazko txapelduna, Joxe Gabirondo gazteluarra, ez da aurtengo finalean izango.

Igande eguerdiko hamabietan hasita ordubete inguruko saioa egingo dute, eta belar kilo gehien ebakitzen duenak jantziko du Gipuzkoako txapela.

Aparkalekuak plazan

Antolakuntza taldetik jakinarazi dutenez proba ikustera joango direnentzat Zaldibiako plaza inguruan jarriko dute aparkalekua. Handik 200 bat metrora dago finala jokatuko den belardia.

Sega Ligako kanporaketa

Bestalde, gaur jokatuko da Almitza sega elkarteak antolatu duen Sega Ligaren hirugarren jardunaldia. Igorren (Bizkaia) bilduko dira, 17:30ean. Herrian bertan izango da saioa.

Momentuz sailkapen orokorrean Gazteluko Gabirondo anai-arrebak dira nagusi. Gizonezkoetan 57 puntu bildu ditu Joxe Gabirondok, Joan Joxe Lizasoren eta Jexuxmari Lasaren aurretik. Emakumezkoetan, 20 puntu daramatza Maria Luixa Gabirondok.

############

finala

Noiz. Igandean, 12:00etan.

Non. Zaldibian, Ibarguren baserriko etxaburuko belardietan.

Lana. Ordubetean, belar kilo gehien nork ebaki.

Aparkalekuak. Zaldibiako plaza inguruan, belarditik 200 metrora.

Segalariak

J.M. Ormaetxea (Orendain).

Andoni Goikoetxea (Gaztelu).

Mikel Aranalde (Gaztelu).

Arkaitz Arteaga (Baliarrain).

############